तुम्ही आमदार द्या,आम्ही नामदार देवू- शिवसेना पक्षप्रमुख उद्धव ठाकरे

सरूड : महाराष्ट्रात आम्ही आपली सत्ता आणल्याशिवाय गप्प बसणार नाही. तुम्ही आमदार दिलात, तर तुमच्या इच्छेनुसार आम्ही नामदार देवू, या मतदारसंघातील शिवसेनेचे खासदार आणि आमदार या दोन तलवारी आहेत, या विरोधकांना लोळवल्याशिवाय राहणार नाहीत. ज्यांना लोळायाचेच असेल तर, आम्ही काय करणार? ज्यांचं नावंच कोरं आहे, त्याला आम्ही तरी काय करणार? असे टीकात्मक विधान माजी मंत्री विनय कोरे यांच्या विषयी बोलताना, शिवसेनेचे पक्षप्रमुख उद्धव ठाकरे यांनी काढले.

सरूड तालुका शाहूवाडी इथं शिवसेनेचे उमेदवार आमदार सत्यजित पाटील यांच्या प्रचार सभेत ते बोलत होते.

ते पुढे म्हणाले कि, या मतदारसंघात पैशाचा अधिक वापर होतो. परंतु पैशापेक्षा माणसं महत्वाची असतात. तीच आपली संपत्ती असते, असे संस्कार सेनाप्रमुख दिवंगत बाळासाहेब ठाकरे यांनी या सेनेवर केले आहेत. इथला आमदार जनतेच्या सुखदुखात सामील होतात. चोवीस तास कार्यकर्त्यांच्या संपर्कात असतात, हि सगळ्यात महत्वाची बाब आहे. कारण दारात जेवढ्या चपला असतात, तेवढी माणसं हीच आपली संपत्ती असते. आपण आपल्या वचननाम्यात १० रुपयात जेवण, शेतकऱ्यांचा सातबारा कोरा करण्याचा, त्याचबरोबर ३०० युनिट च्यावर वीज वापरणाऱ्यांना ३० टक्के सूट देण्याचे याचबरोबर अनेक गोष्टी जनतेसाठी करणार असल्याचे,वचन दिले आहे.

यावेळी खासदार धैर्यशील माने म्हणाले कि, इथल्या जनतेच्या हृदयात आमदारांची जी प्रतिमा आहे, ती हलविण्याची कुणाच्यात हिम्मत नाही. इथल्या मावळ्यांनी भर पावसात भगवी पताका फडकावत विजय आत्मसात केला. इथली जनता जीवापाड प्रेम करणारी आहे, ती विकावू होवू शकत नाही. पक्षप्रमुखांनी विजयी झाल्यावर आम्हाला प्रभू रामचंद्राच्या दर्शनासाठी नेले होते. आपण मला जर राम केले असेल, तर जनतेने सत्यजित आबांना लक्ष्मण म्हणून आमदार बनवत निवडून द्यावे. कारण लक्षमण शिवाय राम अपुरा आहे, असे भावनिक उद्गार खास. माने यांनी  काढले.

यावेळी विद्यमान आमदार सत्यजित पाटील  म्हणाले कि, विरोधकांनी आपली पायरी सोडत, जरी आमच्यावर टीका केली असली तरी, आम्ही आपली पायरी सोडणार नाही. कारण आमच्या आईवडिलांनी आमच्यावर चांगले संस्कार केले आहेत. त्यांच्यावर त्यांच्या आई-वडिलांनी चांगले संस्कार करण्याचा प्रयत्न केला असेल, पण ते त्यांना जर जमले नसेल तर, तो त्यांचा वयैक्तिक दोष आहे, त्यांच्या आईवडिलांचा नाही. आज आपल्या सर्वांच्या दर्शनाने घर भरल्यासारखे वाटत आहे. आमचे विरोधक म्हणतात कि, आम्ही घासून निवडून आलोय. हे जरी खरं असलं, तरी विकासकामे मात्र ठासून केली आहेत. विरोधकांच्या कार्यकाळात त्यांना साधं कोडोलीचं एसटी स्थानक बांधता आलं नाही. बादेवाडी, वेखंडवाडी सारख्या गावात माहिलांना पिण्याच्या पाण्यासाठी वणवण करावी लागत होती. पण आम्ही बहुतांश गावात काही न काही विकासकाम देण्याचा प्रयत्न केला आहे. आजही काही ठिकाणचा विकास अद्याप बाकी आहे, तो लवकरच आपल्या सगळ्यांच्या आशीर्वादाने पूर्ण करू. असे सांगताना ते म्हणाले कि, भविष्यात माझ्या घरातील कुणी माझ्या जागेवर बसणार नाही. तर त्या जागेवर जनतेतील कुणी योग्य व्यक्ती असेल, घराणेशाही इथं राबविली जाणार नाही. ज्यांना १५ वर्षात काही जमलं नाही, ते आम्ही फक्त ५ वर्षात पूर्ण करण्याचा यशस्वी प्रयत्न केला आहे. याची शहानिशा करायची असेल, तर त्यांनी एका व्यासपीठावर येवून लेखाजोखा मांडावा, आमची त्याला तयारी आहे. असेही आमदार सत्यजित पाटील यांनी यावेळी सांगितले.

यावेळी उदय साखर चे संचालक रणवीरसिंग गायकवाड म्हणाले कि, आमदारांना कार्यसम्राट हि पदवी जनतेने दिली आहे. कारण त्यांनी जनतेचे प्रश्न शेतकऱ्याच्या बांधापासून ते विधानसभेच्या बाकापर्यंत नेवून सोडविण्याचा यशस्वी प्रयत्न केला आहे. पैशाचं राजकारण करणाऱ्यांना तडीपार करा, असेही रणवीर सिंग गायकवाड यांनी सांगितले.

यावेळी शिवसेनेचे जिल्हाप्रमुख मुरलीधर जाधव, उपजिल्हाप्रमुख नामदेव गिरी, पंचायत समिती च्या माजी सभापती स्नेहा जाधव, जि.प.सदस्या आकांक्षा पाटील, भाजप चे नगरसेवक राजू प्रभावळकर यांच्यासहित अनेकांनी मनोगते व्यक्त केलीत. यावेळी जि.प.स. हंबीरराव पाटील, नामदेवराव पाटील सावेकर, जालिंदर पाटील रेठरेकर, उपसभापती पांडुरंग पाटील, सुधाकर पाटील नगरसेवक, योगेश कुलकर्णी, अभयसिंह चौगुले, सदस्या लताताई पाटील रेठरेकर, सुरेश पारळे, सुनिता पारळे, अलका भालेकर, सुवर्णा दाभोळकर, आणि अनेक शिवसैनिक मोठ्या संख्येवर उपस्थित होते.

3+
3+

Leave a Reply

Your email address will not be published. Required fields are marked *

error: Content is protected !!
%d bloggers like this: