” आरटीओ ” च्या धास्तीने मलकापूर इथं वडाप जीप चा अपघात : ८ जण जखमी : आरटीओ ची धास्ती कशाला ?
मलकापूर प्रतिनिधी : आरटीओ वाहनाच्या धास्तीने, मलकापूर येथून शाहुवाडी दिशेला निघालेल्या वडाप जीपला (क्र.एम.एच. ११ ई १६०७ ) अपघात झाल्याने ८ जण जखमी झाले आहेत. यापैकी ४ जण गंभीर जखमी असून, त्यांना कोल्हापूर येथील सीपीआर रुग्णालयात पुढील उपचारार्थ पाठविण्यात आल्याचे ग्रामीण रुग्णालय मलकापूर यांच्याकडून समजते.
घटना स्थळावरून मिळालेल्या माहितीनुसार, मलकापूर येथून शाहुवाडी दिशेला जात असलेल्या ( वडाप ) खाजगी वाहनाचा ( जीप ) अपघात झाल्याने सुमारे ८ जण जखमी झाले आहेत. दरम्यान वडाप चालक हा मलकापूर हून शाहुवाडी ला निघाला असता, समोरून आरटीओ चे वाहन आले असता, त्यांना घाबरून जावून,मलकापूर येथील वारंगे कॉम्प्लेक्स जवळ वडाप चालकाने आपले वाहन माघारी फिरवले. परंतु हे करत असताना, गाडी वळवत असताना, ती पलटी झाली. यामुळे झालेल्या अपघातात ८जण जखमी झाले. यावरून आरटीओ ची किती धास्ती वडाप चालकांमध्ये आहे, यावरून दिसून येते. दरम्यान वडाप चालक घटनास्थळाहून पळून गेला आहे.
दरम्यान शाहुवाडी तालुका दुर्गम आहे. येथील प्रत्येक गावात एसटी पोहचतेच असे नाही. मग त्याठीकाणाच्या नागरिकांनी प्रवास करायचा कसा ? या प्रश्नाचे उत्तर आरटीओ खाते देणार का ? कि,केवळ माया गोळा करण्याच्या हेतूने हि वाहने फिरवली जातात. याचा अर्थ वडाप चालक योग्य आहेत का ? , तर याचे उत्तर नक्कीच नाही, असे आहे. परंतु शासन ग्रामस्थांची सोय जर करीत नसेल, तर जनतेने करायचे काय ? बाजारहाट करणे बंद करायचे का ? कि, इतर ठिकाणी जायचेच नाही. यावरून, असें लक्षात येते कि, जोपर्यंत शासन दळणवळणाची व्यवस्था शेवटच्या गावापर्यंत करीत नाही, तोपर्यंत या तरुण वडाप चालकांना नियमित करून, परवाने दिले, तर जनतेची दळणवळणाची व्यवस्था होईल. तसेच तरुण बेरोजगारांना रोजगार उपलब्ध होईल.
दरम्यान आरटीओ वाहन अधिकाऱ्यांना जनतेच्या वतीने आवाहन आहे कि, या गोष्टींवर चिंतन करून मार्ग काढावा.
असो. सदर च्या अपघातात शीलाबाई मोरे ( टेकोली ) वय ५५ वर्षे, अशोक लोखंडे ( पनुंद्रे ) वय ६० वर्षे, श्रीकांत जंगम ( कासार्डे ) वय २६ वर्षे, गंगुबाई लोखंडे ( पनुंद्रे ) वय ७० वर्षे, अनुसया लोखंडे ( पनुंद्रे ) वय ५५ वर्षे, साहिल जंगम ( कासार्डे ) १८ वर्षे, दत्तू पाटील ( टेकोली ) ६५ वर्षे, बेबीताई पाटील ( टेकोली ) ६० वर्षे, आदी मंडळी जखमी झाली आहेत.
