उचत इथं मुलाकडून च वडिलांचा खून

बांबवडे : उचत तालुका शाहुवाडी इथं मुलाने, आपण ठेवलेले पैसे मिळत नसल्याच्या रागातून स्वत:च्याच वडिलांचा दि.१२ फेब्रुवारी २०२६ रोजी संध्याकाळी ७ ते रात्री १० वाजण्याच्या दरम्यान खून केल्याची घटना घडली आहे. सदर घटनेची शाहुवाडी पोलीस ठाण्यात नोंद करण्यात आली असून, मुलाला अटक करण्यात आली आहे.

याबाबत शाहुवाडी पोलीस ठाण्याकडून व घटना स्थळावरून  मिळालेल्या माहितीनुसार संतोष दत्ताराम केसरकर याने आपले वडील दत्ताराम संभाजी केसरकर वय (८३ वर्षे ) यांच्या डोक्यात कोणत्यातरी हत्याराने मारले. घाव डोक्यात वर्मी लागल्याने ते जागीच गतप्राण झाले.

अधिक माहितीनुसार संतोष दत्ताराम केसरकर हा आपले वडील, पत्नी व मुलगा यांच्यासमवेत उचत इथं गांधी यांच्या घराच्या मागील बाजूस रहात होता. त्यांचे मूळ गाव गावडी तालुका शाहुवाडी हे आहे. दरम्यान संतोष याने आणलेले पैसे घरात  कुठेतरी ठेवले होते. परंतु पैसे शोधताना ते सापडले नाहीत. त्यामुळे त्याने घरात शिवीगाळ करून वाद केला. काल दि.१२ फेब्रुवारी २०२६ रोजी मी बाहेरून जावून येईपर्यंत पैसे सापडले नाही, तर कोणाला सोडणार नाही. असे सांगून तो बाहेर निघून गेला. दरम्यान मुलाचे गॅदरिंग असल्याने संतोष ची पत्नी मुलाला घेवून गॅदरिंग पाहण्यास निघून गेली. त्या दरम्यान संतोष घरी परत आला. आणि सदरची घटना घडली. वडिलांच्या डोक्यात लागल्याने रक्त जमिनीवर  सांडले होते. पुरावा नष्ट करण्याच्या हेतूने ते त्याने ओढणीने तसेच मॉप ने  पुसण्याचा प्रयत्न केला होता.

सदरच्या घटनेची फिर्याद सौ साधन संतोष केसरकर वय ३६ वर्षे  यांनी शाहुवाडी पोलीस ठाण्यात दिली आहे. सदरच्या घटनेची नोंद  शाहुवाडी पोलीस ठाण्याचे पोलीस उपनिरीक्षक श्री अतुल सोनुले यांनी केली असून, अधिक तपास शाहुवाडी पोलीस ठाण्याचे पोलीस निरीक्षक विजय घेरडे आणि पोलीस कर्मचारी करीत आहेत.