तालुक्यात ७ मार्च पासून महाराजस्व शिबिराचे आयोजन- तहसीलदार सोनावणे
शाहुवाडी प्रतिनिधी : सर्वसामान्यांचे महसूल विषयक प्रश्न निकाली काढण्यासाठी आणि शासकीय सेवा थेट जनतेच्या दारी पोहचवण्यासाठी महाराजस्व शिबिराचे आयोजन करण्यात आले आहे. तहसीलदार कार्यालयाच्या वतीने छत्रपती शिवाजी महाराज महाराजस्व समाधान शिबिराचे आयोजन ७ ते १५ मार्च २०२६ पर्यंत करण्यात आले आहे.
या कालावधीत तालुक्यातील सहा मुख्य महसूल मंडल मध्ये अभियान राबवले जाणार आहे. अशी माहिती प्रसिद्धी पत्रकाद्वारे शाहुवाडी च्या तहसीलदार सीमा सोनावणे यांनी दिली.
या प्रसिद्धी पत्रकामध्ये असे सांगितले आहे कि, महसूल खात्यातील प्रलंबित कामांचा निपटारा करणे, व प्रशासनाच्या योजना व त्याबाबत ची माहिती प्रत्येक घरापर्यंत पोहचवणे, हा या अभियानाचा मुख्य उद्देश आहे. तसेच शासनाच्या महसूल व वन विभागाच्या विशेष निर्णयानुसार हे अभियान आयोजित केले आहे. प्रशासन लोकांच्या दारी या संकल्पनेतून हे शिबीर आहे. यामध्ये तक्रार निवारण, डिजिटल सेवा यांचा वापर या अभियानात करण्यात येणार आहे. या सर्व बाबींची माहिती देण्यासाठी उपविभागीय अधिकारी समीर शिंगटे पन्हाळा यांच्या अध्यक्षतेखाली तहसीलदार सीमा सोनावणे यांच्या उपस्थितीत शनिवार दि. २८/२/२०२६ रोजी बैठक घेण्यात आली होती. या अभियानात मिळणाऱ्या प्रमुख सेवा :
- डिजिटल सेवांचे प्रशिक्षण, व त्यांचा जास्तीत जास्त वापर करणे.
- जिवंत सातबारा मोहिमेंतर्गत सातबारा वाचून पूर्ण करून, ए. कु.पु. नोंदी. अ.पा.क. नोंदी निर्गत करण्याची कार्यवाही करणे.
- संजय गांधी योजनेतील पात्र लाभार्थ्यांना मंजुरी प्रमाणपत्र देणे, व नवीन अर्ज स्वीकारणे.
- दाखले वाटप न झालेल्या विद्यार्थ्यांकडून आवश्यक कागदपत्रासह परिपूर्ण अर्ज भरून घेणे.
- प्रलंबित फेरफार निकाली काढणे.
- अभिलेख दुरुस्ती सातबारा मधील चुका संदर्भात अर्ज स्वीकारणे. व कलम १५५ नुसार दुरुस्ती करणे.
- अकृषक तरतुदी संदर्भातील सुधारणा बाबत मार्गदर्शन करणे.
- भूसंपादन केलेल्या व अकृषक परवानगी दिलेल्या प्रकरणी कमी जास्त पत्रकाप्रमाणे सातबारा पत्रकी अंमल घेवून दुरुस्त सातबारा वाटप करणे. यासह उत्पन्न, रहिवाशी, जात, आणि नॉन क्रिमीलेअर यासारखे महत्वाची प्रमाणपत्रे त्यादिवशी देण्याचा प्रयत्न करणे. तसेच ग्रामविकास, कृषी विभागासह इतर विभागाच्या सेवा लोकांना पुरवणे. आरोग्य शिबिराचे आयोजन करून मोफत रक्त तपासणी करणे. अॅग्री स्टॅक नोंदणी, पीएम किसान नोंदणी करणे या सुविधा देण्यात येणार आहेत. ( ७ मार्च सरूड आनंद हॉल ), (१४ मार्च आंबा हॉल ), ( १० एप्रिल स्वामी समर्थ हॉल बांबवडे ), ( १७ एप्रिल करंजफेण आनंद्कुंज प्राथमिक शाळा ), ( ८ मे दत्तसेवा विद्यालय तुरुकवाडी ), (१५ मे मलकापूर संकल्प सिद्धी हॉल येळाणे) याठिकाणी सदर शिबिराचे आयोजन करण्यात आले आहे.
पारदर्शक आणि लोकाभिमुख महसूल प्रशासन देण्यासाठी व लोकांना सेवा पुरवणे हा मुख्य उद्देश या अभियानाचा आहे. नागरिकांनी आपल्या मंडलातील शिबिरांच्या दिवशी व पूर्वी सर्व विभागांच्या योजना प्रभावीपणे राबवण्यासाठी ग्राम महसूल अधिकारी, ग्रामपंचायत अधिकारी, व कृषी विभाग यांच्याशी संपर्क साधून त्या त्या विभागाकडे अर्जदार यांनी परिपूर्ण अर्ज देण्यात यावेत, तसेच आवश्यक मूळ कागदपत्रे आणि छायांकित प्रतींसह उपस्थित राहून, या सुवर्णसंधीचा लाभ घ्यावा, असे आवाहन समीर शिंगटे उपविभागीय अधिकारी पन्हाळा, सीमा सोनावणे तहसीलदार शाहुवाडी यांनी केले आहे.
सदर बैठकीला तालुक्यातील जिल्हापरिषद सदस्य, पंचायत समिती सदस्य, सरपंच, ग्रामपंचायत सदस्य, तसेच ग्राम महसूल अधिकारी, ग्रामपंचायत अधिकारी आदी मान्यवर या बैठकीला उपस्थित होते.
