शाहुवाडी पंचायत समिती च्या सभापती पदी प्रियांका भोसले,तर उपसभापती पदी अमरसिंह खोत यांची निवड
शाहुवाडी : शाहुवाडी पंचायत समिती च्या सभापती पदी प्रियांका भोसले,तर उपसभापती पदी अमरसिंह खोत यांची निवड करण्यात आली आहे. सदर ची निवड चिठ्ठ्या टाकून करण्यात आली आहे. सदर सभापती प्रियांका भोसले व उपसभापती श्री अमरसिंह खोत यांचे साप्ताहिक शाहुवाडी टाईम्स, एसपीएस न्यूज च्यावतीने हार्दिक अभिनंदन.
शाहुवाडी पंचायत समिती च्या एकूण ८ गणांमधून निवडून आलेल्या उमेदवारांपैकी सभापती पदासाठी महिलांच्या चिठ्ठ्या टाकण्यात आल्या. यामध्ये जनसुराज्य शक्ती पक्षाच्या प्रियांका भोसले यांच्या नावाची चिठ्ठी निघाल्याने त्यांची सभापती पदी वर्णी लागली आहे. उपसभापती पदासाठी सुद्धा चिठ्ठ्या टाकण्यात आल्या. यातून सुद्धा जनसुराज्य शक्ती चे कडवे गण चे विजयी उमेदवार अमरसिंह खोत यांची उपसभापती पदी वर्णी लागली आहे.
या मतदान प्रक्रियेत निवडणूक निर्णय अधिकारी म्हणून तहसीलदार सीमा सोनवणे,गटविकास अधिकारी श्री मंगेश कुन्चेवार यांनी काम पाहिले.
दरम्यान पंचायत समिती गणासाठी जनसुराज्यच्या चार जागा तर माजी आमदार सत्यजित पाटील व मान्सिंग्दादा युतीच्या चार जागा निवडून आल्या आहेत. त्यामुळे दोघांचेही समान उमेदवार निवडून आल्याने शेवटी चिठ्ठी टाकून सभापती व उपसभापती निवड करण्यात आली आहे. छत्रपती शाहू हायस्कूल चा विद्यार्थी कुमार रुद्र बाबासाहेब पाटील यांच्या हस्ते चिठ्ठी काढण्यात आली.
