महेश निकम यांची एमपीएससी परीक्षेत उत्तुंग झेप
बांबवडे : बांबवडे तालुका शाहुवाडी येथील निवृत्त सैनिक श्री महेश जयसिंग निकम हे एम.पी.एस.सी. परीक्षेच्या माध्यमातून कर सहाय्यक अधिकारी ( Income Tax Assistant ), ( GST ) महसूल सहाय्यक अधिकारी अशा दोन पदांवर ते उत्तीर्ण झाले आहेत. त्यांच्या या यशाबद्दल त्यांचे साप्ताहिक शाहुवाडी टाईम्स व एसपीएस न्यूज परिवाराच्या वतीने हार्दिक अभिनंदन.
महेश निकम हे ३१ मार्च २००९ रोजी आर्मी एअर डिफेन्स म्हणजेच सैन्यात भरती झाले. बांबवडे येथील एक होतकरू तरुण आपल्या करिअर ची सुरुवात देशसेवेपासून करतो, आणि त्यातील अनुशासन आत्मसात करून त्यांनी आपल्या आयुष्याला वेगळी दिशा दिली. त्यांनी सियाचीन ग्लेसियर, श्रीनगर, जम्मू अशा अतिसंवेदनशील असलेल्या ठिकाणी आपले कर्तव्य बजावले.
अशा ठिकाणी काम करताना, हे कळले कि, कितीही कठीण प्रसंग असला तरी जिद्द, आणि चिकाटी व अनुशासन आत्मसात केल्यास आपण कोणत्याही परिस्थितीत यशस्वी होवू शकतो, हे जाणवले. इथला
अनुभव मला या परीक्षा उत्तीर्ण करताना उपयोगी पडला. असे महेश निकम यांनी एसपीएस न्यूज बोलताना सांगितले. ते पुढे म्हणाले कि, फेब्रुवारी २०२५ मध्ये सेवा निवृत्ती घेतली. त्यानंतर एमपीएससी परीक्षेच्या अभ्यासाची तयारी सुरु केली. जून २०२५ ला पूर्व परीक्षा दिली. त्यामध्ये चांगल्या गुणांनी उत्तीर्ण झालो. व मुख्य परीक्षेची तयारी सुरु केली. २१ सप्टेंबर २०२५ ला मुख्य परीक्षा दिली. महाराष्ट्रामध्ये चांगल्या गुणांनी संपूर्ण माजी सैनिक प्रवर्गातून तिसऱ्या स्थानी माझी निवड झाली.
या प्रवासात चौगुले उद्योग समूह संचालित व्हिजन स्टडी सेंटर चे सागर चौगुले सर यांनी मोलाचे मार्गदर्शन केले. तसेच अभ्यासिकेतील इतर मित्र वर्गाने देखील मोलाचे मार्गदर्शन केले.
मी जे काही यश संपादन करू शकलो, ते माझे आई वडील, पत्नी आणि कुटुंबीय यांनी केलेल्या सहकार्यामुळेच करू शकलो, याबद्दल सर्वांचेच मानावे तेवढे आभार थोडेच आहेत. असेही श्री महेश निकम यांनी सांगितले.
