साळशी त झालेल्या जळीतात म्हैशीचा होरपळून मृत्यू
बांबवडे :साळशी तालुका शाहुवाडी इथं बिरोबाच्या माळावर असलेल्या गोठ्याला अचानकपणे आग लागली. या आगीत शेतकऱ्याची एक म्हैस मृत्युमुखी पडल्याने परिसरातून हळहळ व्यक्त केली जात आहे. सदर घटनेचा प्रशासनाने पंचनामा करून पुढील कारवाई साठी पाठवण्यात आला आहे. सदर च्या शेतकऱ्याला नुकसान भरपाई मिळावी, अशी मागणी शेतकरी वर्गातून केली जात आहे.
साळशी गावातील बिरोबाच्या माळावर गायरानात प्रल्हाद श्रीपती पाटील हे रहात असून जवळच जनावरांसाठी शेड बांधले आहे. या शेड शेजारीच प्रल्हाद पाटील व आनंदा नाना पाटील यांच्या वैरणीच्या गंज्या ठेवण्यात आल्या आहेत. इथंच जळावू लाकूड फाटा, शेणी व इतर अवजारे होती. अचानकपणे दुपारी येथील वैरणीच्या गंजींना आग लागली. बघता बघता आगीने रुद्ररूप धारण केले. त्यामुळे प्रल्हाद यांच्या जनावरांच्या शेडला आगीने वेढले. या घटनेत प्रल्हाद पाटील यांच्या म्हैशीचा होरपळून मृत्यू झाला. आग विझवण्यासाठी अग्निशमन दल चे वाहन देखील आले होते.
