बांबवडे च्या मातीला सोन्याची झळाळी : “ साईवर्धन ”
बांबवडे : शाहुवाडी तालुक्यातील बांबवडे इथं जन्मलेल्या साईवर्धन विक्रम पाटील या युवकाने परदेशात जावून आपल्या कर्तुत्वाची दिमाखदार कामगिरी केली, आणि आपल्या देशाला सुवर्णपदक मिळवून दिले, हि कामगिरी एवढी मोलाची आहे कि, कधीकाळी तालुक्याला मागास ठरवणाऱ्या लोकांच्या डोळ्यात अंजन घातले, आणि सोन्याची झळाळी अवघ्या देशाला दाखवून दिले. यास्तव साईवर्धन विक्रम पाटील यांचे साप्ताहिक शाहुवाडी टाईम्स आणि एसपीएस न्यूज परिवाराच्या वतीने हार्दिक अभिनंदन.
साईवर्धन विक्रम पाटील यांनी आशिया युथ पॅरागेम्स स्पर्धेत सुवर्णपदक पटकावले. त्यांनी या स्पर्धेत ११.६७ मिटर गोळाफेक करून सुवर्णपदकावर आपले नाव कोरले. हि अतुलनीय कामगिरी केवळ बांबवडे, शाहुवाडी पुरती मर्यादित नसून, अवघ्या देशाला अभिमान वाटावा, अशी आहे.
साईवर्धन एस.के. थ्रोवर्स अॅकॅडमी मध्ये पॅरालीम्पिंग सिल्व्हर मेडलिस्ट व अर्जुन पुरस्कार प्राप्त मा. श्री सचिन खिलारे यांच्या मार्गदर्शनाखाली प्रशिक्षण घेतले आहे. त्यांनी चौथ्या राज्यस्तरीय पॅराअॅथालेटिक चँपियनशिप २०२५ कोल्हापूर महाराष्ट्र येथे संपन्न झालेल्या स्पर्धेत सुवर्णपदक प्राप्त केले होते. या आधारे त्याची महाराष्ट्र राज्याकडून १४ व्या ज्युनिअर,व सब ज्युनिअर नॅशनल स्पर्धेसाठी ग्वाल्हेर येथे निवड झाली. हि स्पर्धा पॅराकमिटी ऑफ इंडिया यांनी आयोजित केली होती. साईवर्धन ने इथे रौप्यपदक पटकावले.या आधारे त्यांची दुबई साठी निवड झाली होती. त्यांनी या आधारे सगळ्या यशाचे श्रेय प्रशिक्षक, आई-वडील, पॅरा कमिटी कोल्हापूर,तसेच त्यांचे मामा जि.प.सदस्य पैलवान विजयराव बोरगे यांना देत आहे. साईवर्धन यांनी मिळवलेले अतुलनीय यश बांबवडेकरांनी सार्थ ठरवले. साईवर्धन यांची बांबवडे नगरीतून मिरवणूक काढण्यात आली.
बांबवडे गावाला तालुकास्तरीय क्रीडासंकुल मंजूर होतं. परंतु वरिष्ठ नेत्यांची इच्छाशक्ती कमी पडली. आणि ते क्रीडासंकुल आजही सरकारी फाईली मध्ये दबून राहिले आहे, अन्यथा साईवर्धन सारखे अनेक खेळाडू या बांबवडे च्या मातीत डौलाने मिरवले असते. या गोष्टीचा वरिष्ठ नेत्यांना तसेच प्रशासनाला जाणीवपूर्वक विसर पडला आहे. साईवर्धन यांची काढलेली मिरवणूक या बांबवडे च्या मातीला खऱ्या अर्थाने भूशनावह ठरली आहे.
कारण ज्या मातीत अनेक खेळाडू निर्माण झाले अनेक विक्रम या शाहुवाडी तालुक्याने पाहिले. याच तालुक्याला सर्वाधिक प्रशासकीय अधिकारी देणारा शाहुवाडी तालुका म्हणून गौरविले आहे. भविष्यात सर्वाधिक खेळाडू निर्माण करणारा तालुका म्हणून भूषविले जावे, हीच या यशाची गुरुकिल्ली असेल.
