बेरोजगारी निर्मुलनाला वहिनिसाहेबांचा आधार
बांबवडे :माजी आमदार स्व. श्रीमती संजीवनीदेवी संजयसिंह गायकवाड यांची प्राणज्योत मालवली, आणि पुन्हा एकदा संजयदादांवर प्रेम करणारा कार्यकर्ता पोरका झाला. संजयदादांच्या नंतर वहिनीसाहेब हा एकमेव आधार कार्यकर्त्याला वाटत होता. याच अनुषंगाने त्यांनी केलेली कामे आणि सांभाळलेला कार्यकर्ता यावर प्रकाशझोत टाकत आहोत.
वहिनीसाहेब समोरून दिसताना कडक वाटत होत्या, परंतु मानसिकतेतून विचार केल्यास त्यांनी दादांवर प्रेम करणारा कार्यकर्ता मोठ्या शिताफीने जपला होता. कोल्हापूर असो,कि सुपात्रे, त्या आपल्या कार्यकर्त्याची जातीनिशी विचारपूस करायच्या.
त्या शाहुवाडी तालुक्यातील पहिल्या महिला आमदार ठरल्या होत्या. तसं पाहता,शाहुवाडी तालुक्यातून महिला आमदार निवडून येणे, हे तितकेसे सोपे नव्हते. कारण अनेक दिग्गज मंडळी विरोधात समोर उभी होती. त्यातून संजय दादांवर सागरासम प्रेम करणारी माणसे सह्याद्रीची छाती पुढे काढून उभी होती. यामध्ये तरुण कार्यकर्त्यासह वयोवृद्ध मंडळी सुद्धा मागे नव्हती. म्हणून वहिनीसाहेब आमदार झाल्या. प्रत्येक निर्णय घेताना दादांच्या कार्यकर्त्याला विचारून निर्णय घेत होत्या. म्हणूनच संजय दादांवर प्रेम करणारी मंडळी वहिनिसाहेबांसमोर व्यक्त होताना कधी कचरली नाहीत. या अगोदर दादा असताना वहिनीसाहेब तीन पंचवार्षिक गोकुळ च्या संचालक म्हणून कार्य करीत होत्या. त्या माध्यमातून त्यांनी तालुक्यात दुध संस्थांचे जाळे निर्माण केले. यामुळे शेती करणारा तरुण वर्ग दुधाच्या माध्यमातून तसेच संस्थांच्या माध्यमातून समृद्ध झाला. तरुणांच्या हाताला रोजगार मिळाला.सकाळी दोन तास आणि संध्याकाळी दोन तास संस्थेचे काम करून हा तरुण आपल्या कुटुंबाचे उदरनिर्वाह चालवीत होता. त्यामुळे बेरोजगारीला आळा घालण्यास काही अंशी का होईना, मदत झाली.
त्याकाळात विजेचा लपंडाव सातत्याने सुरु असायचा. त्यासाठी वहिनिसाहेबांनी ठमकेवाडी इथ विद्युत सबस्टेशन ची मागणी केली. आणि तालुक्यातील हा लपंडाव बऱ्याच प्रमणात कमी झाला.
इतर तालुक्यातील विद्यार्थी पोलीस भरतीसाठी , तसेच अनेक खेळात प्राविण्य मिळवत होती. यासाठी आपल्या तालुक्यात सुद्धा असलेले अनेक हिरे चमकावेत, हा दुर्दृष्टीकोन समोर ठेवून त्यांनी तालुका क्रीडा संकुल चा पाठपुरावा केला. ते मंजूर हि झाले. त्याचा दहा लाखाचा हफ्ता कार्यान्वित सुद्धा झाला. परंतु तालुक्याच्या दुर्दैवाने त्यानंतर आलेल्या विधानसभेत पराभव झाला,आणि तालुकास्तरीय क्रीडासंकुल अपूर्णावस्थेत राहिले, ते आजही त्याच अवस्थेत आहे.
वहिनिसाहेबांच्या नंतर दादांच्या गटाला उतरती कळा लागली. असो.
माजी आमदार वहिनीसाहेब यांच्या कार्यकर्तुत्वाला साप्ताहिक शाहुवाडी टाईम्स व एसपीएस न्यूज परिवाराच्या वतीने भावपूर्ण शब्द सुमनांजली.
