मलकापूर एसटी आगारातील रोकड विभागाला आग
बांबवडे : शाहुवाडी तालुक्यातील एकमेव असलेल्या मलकापूर एसटी आगाराच्या रोकड विभाग असलेल्या खोलीला रात्री अचानक आग लागली.
एसटी आगाराच्या या रोकड विभाग असलेल्या खोलीला काल दि.२७ ऑगस्ट २०२६ च्या मध्यरात्री च्या दरम्यान विजेचे शॉर्टसर्किट मुळे आग लागली असल्याची माहिती मिळत आहे.
या आगीमध्ये तिकीट काढण्याची कंडक्टर ची सुमारे ६० मशीन्स जळाली आहेत. यासोबत ३ प्रिंटर, २ कॉम्प्युटर, आणि खोलीतील फर्निचर आगीच्या भक्ष्यस्थानी पडले आहे.
यावेळी मलकापूर नगरपरिषद च्या अग्निशमन दलाने हि आग आटोक्यात आणली.
२८ ऑगस्ट रोजी रक्षाबंधन हा सण आहे. याचे भान ठेवून आगारप्रमुख आणि कर्मचारी वर्गाने आगीची घटना बाजूला ठेवून प्रवाशांसाठी एसटी ची यंत्रणा नेहमीप्रमाणे सुरु ठेवली आहे. याचे कौतुक आहे. कंडक्टर ची मशीन्स जरी जळाली असली,तरीदेखील त्यांनी व्यवस्था करून एसटी च्या फेऱ्या सुरु ठेवल्या आहेत.
यावेळी आगारप्रमुख व्ही.आर. जगदाळे यांनी आगाराची व्यवस्था या कठीण प्रसंगी शिताफीने जपली आहे. यावेळी विभाग नियंत्रक वृषाली श्रीकांत भोसले यांनी घटनास्थळाला भेट देवून घटनेची पाहणी केली. यावेळी येथील अधिकारी सुहास कामत यांच्यासह सर्व एसटी कर्मचारी यांनी धीराने परीस्थितीला नियंत्रणात आणले.
