गोंडोलीचे जवान विक्रम चव्हाण उरी सेक्टर मध्ये शहीद
बांबवडे : बलिदानाचा वारसा सह्याद्रीच्या मातीने आज पुन्हा एकदा जोपासला असल्याचे सिद्ध झाले आहे.
गोंडोली तालुका शाहुवाडी येथील जवान विक्रम बाळकृष्ण चव्हाण वय २८ वर्षे हे जम्मू काश्मीर येथील उरी सेक्टर मध्ये ग्रॅनाईड च्या स्फोटामध्ये शहीद झाले आहेत. गस्त घालत असताना त्यांना वीरमरण आले आहे. शहीद विक्रम चव्हाण यांचे पार्थिव गोंडोली मध्ये शुक्रवार दि.१२/०६ २०२६ रोजी येणार असल्याची माहिती शाहुवाडी पोलीस ठाण्याचे पोलीस निरीक्षक राजेंद्र सावंत्रे यांनी दिली आहे.
याबाबत सविस्तर हकीकत गोंडोली येथील श्री आनंदा परुळेकर यांनी एसपीएस न्यूज शी बोलताना दिली.
विक्रम चव्हाण हे २०१८ साली सैन्यात दाखल झाले. सर्वप्रथम त्यांचे ट्रेनिंग अहिल्यानगर इथं झाले. पहिली पोस्टिंग राजस्थान मधील सुरतगड इथं झाले.
जम्मू काश्मीर मधील बारामुल्ला जिल्ह्यातील उरी सेक्टर मध्ये नियंत्रण रेषेजवळ झालेल्या हँडग्रेनाईड च्या स्फोटात दोन भारतीय जवान शहीद झाले. त्यामध्ये आपल्या गोंडोली चे जवान विक्रम चव्हाण हे शहीद झाले आहेत.
त्यांच्या पश्चात वडील बाळकृष्ण गणपती चव्हाण वय ६६ वर्षे, पत्नी रुपाली विक्रम चव्हाण, मुलगी वीरा विक्रम वय चव्हाण वय २ वर्षे, भाऊ सागर चव्हाण, तीन विवाहित बहिणी असा परिवार आहे. त्यांच्या आई छाया बाळकृष्ण चव्हाण यांचे काही महिन्यांपूर्वीच निधन झाले आहे. अशा या शहीद जवानाला एसपीएस न्यूज परिवाराच्या वतीने भावपूर्ण श्रद्धांजली.
