मलकापूर पंढरपूर दिंडी आटपाडी त दाखल

शाहुवाडी : श्री विठ्ठलाच्या दर्शनासाठी मलकापूर ते पंढरपूर पायी निघालेली वारकरी दिंडी मजल दरमजल करत सध्या ते आटपाडी येथे पोहचली आहे.

वारकरी पायी दिंडी मंडळाचे अध्यक्ष मानसिंग खोत व उपाध्यक्ष नामदेव भोसले यांच्या नेतृत्वाखाली मलकापूर परिसरातील सुमारे २५० वारकरी दिंडीत सहभागी झाले आहेत.

पायी दिंडीची सुरुवात मलकापूर येथून गुरुवारी १६ जुलै रोजी झाली. मलकापूर, निळे पैकी भोसलेवाडी, कडवे, कोपर्डे, लाळेवाडी, उचत, चनवाड, बेलेवाडी (शीराळा ) येथील वारकरी दिंडीत सहभागी झाले आहेत. श्री विठ्ठल नामाचा जप करत दिंडी शिरगाव, ईश्वरपूर, बलवडी, लेंगरे, बनपुरी मार्गे आटपाडी येथे दाखल झाली आहे. दिंडीत एकूण १० मुक्काम आहेत. हैबती बसरे, रंगराव मोरे, तुकाराम कदम, रामचंद्र कळंत्रे, संजय चावरे यांच्या मार्गदर्शनाखाली दिंडी नित्याक्रमाने मार्ग क्रमण करीत आहे. शुक्रवार दि. २४ जुलै रोजी दिंडी पंढरपूर तीर्थक्षेत्री पोहोचणार आहे. प्रत्येक मुक्कामाच्या ठिकाणी भजन,कीर्तन व रिंगण सोहळे झाले.