माण ची रुग्णवाहिका पेटल, कि, पेटवली ?: तपास गरजेचा
बांबवडे :माण तालुका शाहुवाडी येथील माण प्राथमिक आरोग्यवर्धिनी ची रुग्णवाहिका काल दि. २९ एप्रिल च्या रात्री ज्याठिकाणी लावली होती, तिथेच जळून खाक झाली. याबाबतची फिर्याद माण चे वैद्यकीय अधिकारी यांनी शाहुवाडी पोलीस ठाणे मध्ये दिली आहे.
घटना स्थळाला गटविकास अधिकारी तसेच जिल्हा आरोग्य अधिकारी यांनी भेट दिली आहे.
याबाबत घटनास्थळ तसेच अधिकाऱ्यांकडून मिळालेली सविस्तर हकीकत अशी कि, दि.२९ एप्रिल रोजी रुग्णवाहिका आहे, त्या ठिकाणी म्हणजेच माण आरोग्यवर्धीनी च्या आवारातच लावली होती. त्याठिकाणी फक्त एक छोटा बल्ब आहे. तरीसुद्धा रुग्णवाहिका कशी पेटली ? हा प्रश्न अधिकारी व ग्रामस्थ सगळ्यांनाच पडला आहे. रुग्णवाहिका शॉर्टसर्किट ने पेटली असे गृहीत धरल्यास, तशा आशयाची काहीच लक्षणे तिथे दिसत नाही. याचा अर्थ रुग्णवाहिका कोणीतरी पेटवली का ? असा प्रश्न सुद्धा उपस्थित होत आहे.
यासाठी आरोग्यविभागाच्या वतीने तक्रार दाखल करण्यात आली आहे. अधिक तपास शाहुवाडी पोलीस ठाणे करीत आहे.
दरम्यान जर हि रुग्णवाहिका इतर कोणी पेटवली असेल, तर त्याचा शोध लागणे गरजेचे आहे. जि रुग्णवाहिका इतरांचे प्राण वाचवण्यासाठी उपयोगात आणली जाते, तीच आगीच्या भक्ष्यस्थानी पडणार असेल, तर याची जबादारी नेमकी कोण घेणार ? हा प्रश्न सुद्धा महत्वाचा आहे. दरम्यान पोलीस खात्याने सदर घटनेचा त्वरित तपास लावावा, अन्यथा जनक्षोभ उसळण्याची शक्यता नाकारता येत नाही.
