“ सोनम वांगचुक ” यांच्या समर्थनार्थ सोमवारी निदर्शने
बांबवडे : भारताचे पर्यावरण व शिक्षण तज्ञ सोनम वांगचुक यांच्या उपोषणाला पाठींबा दर्शविण्यासाठी व केंद्र शासनाचा निषेध करण्यासाठी स्वाभिमानी पँथर्स प्रतिष्ठान च्या वतीने सोमवार दि. २० जुलै२०२६ रोजी सकाळी ११.००वा. शाहुवाडी तहसील कार्यालयावर निदर्शने करण्यात येणार आहेत. तशा आशयाचे निवेदन प्रतिष्ठान च्या वतीने तहसीलदार सौ. शुभांगी जाधव यांना तसेच शाहुवाडी पोलीस ठाण्याचे पोलीस निरीक्षक राजेंद्र सावंत्रे यांना देण्यात आले आहे.
प्रकाश कांबळे करुंगळेकर यांच्या नेतृत्वाखाली शाहुवाडी तहसील कार्यालय इथं निषेध करण्यात येणार आहे.
देशाचे ज्येष्ठ शास्त्रज्ञ सोनम वांगचुक हे गेले २० दिवस आमरण उपोषणाला बसले आहेत. सध्या देशात सुरु असलेला शैक्षणिक क्षेत्रातला भ्रष्टाचार तसेच पेपर फुटी प्रकरणी शिक्षणमंत्री यांना बडतर्फ करा, या मागणीसाठी श्री वांगचुक हे दिल्ली येथील जंतर मंतर मैदानात उपोषणाला बसले आहेत. त्यांच्या उपोषणाला प्रशासनाकडून कोणताही प्रतिसाद मिळत नाही. तसेच शासनाच्या वतीने कोणीही उपोषण स्थळाला भेट देण्यासाठी सुद्धा कोणी गेलेले नाही. शासनाच्या या निष्क्रिय प्रतिसादाच्या निषेधार्थ शाहुवाडी तहसील कार्यालय येथे सोमवारी निदर्शने होणार आहेत.
यावेळी प्रतिष्ठानचे अध्यक्ष प्रकाश कांबळे, बाबासाहेब कांबळे, आनंदराव कामत, अमित गायकवाड शंकर कांबळे, विकास साठे, शिवाजी मोरे, उस्मान हवालदार, पिंटू देसाई, राजेंद्र डोंगरे, विलास घोलप यांच्यासह अनेक कार्यकर्ते बहुसंख्येने उपस्थित होते.
