मागासवर्गीय महिला मारहाण प्रकरणी सभापती यांनी राजीनामा द्यावा-श्री अभयसिंह चौगुले आणि सदस्य
बांबवडे : शित्तूर तर्फ वारुण येथील तानाजी भोसले यांनी मागासवर्गीय महिलेला अर्वाच्च्य भाषेत शिवीगाळ करीत मारहाण केली. या घटनेचा शाहुवाडी पंचायत समिती चे विरोधी गट नेते अभयसिंह चौगुले व इतर महिला सदस्या यांनी जाहीर निषेध केला आहे. तसेच या घटनेची नैतिक जबाबदारी स्वीकारीत सभापती प्रियांका भोसले यांनी राजीनामा द्यावा, अशी मागणी देखील यावेळी करण्यात आली.
यावेळी बहुजन वंचित दलित संघटनेचे जिल्हा उपाध्यक्ष संदीप कांबळे डोणोलीकर तालुकाध्यक्ष संजय घोलप यांनी सुद्धा सदर घटनेचा जाहीर निषेध केला आहे. तसेच त्यांना तत्काळ अटक करण्यात यावी, अन्यथा उग्र आंदोलन करण्यात येईल, असा इशारा देखील देण्यात आला आहे.
यावेळी शिवसेनेच्या महिला आघाडीच्या कार्यकर्त्या सौ सुवर्णा दाभोळकर यांनीसुद्धा सदर घटनेचा निषेध करीत, आरोपीला अटक करण्यात यावी, अशी मागणी केली आहे.
बांबवडे तालुका शाहुवाडी इथं संयुक्त पत्रकार परिषद संपन्न झाली. या पत्रकार परिषदेत वरील मागणी करण्यात आली.
यावेळी बोलताना सौ. माधुरी दिलीप पाटील म्हणाल्या कि, महिलांचा सन्मान न करणाऱ्या आणि मागासवर्गीय समाजातील महिलेला मारहाण करणाऱ्या इसमाला तत्काळ अटक झाली पाहिजे.
यावेळी श्री अभयसिंह चौगुले म्हणाले कि, सदर च्या तानाजी भोसले यांनी अनेक वेळा शाहुवाडी पंचायत समितीची सभापती यांना पंचायत समितीच्या कार्यक्रमासाठी देण्यात आलेल्या वाहनाचा त्यांनी गैरवापर केला आहे. पंचायत समितीचे वाहन शित्तूर वारुण च्या बाजारात विनाकारण उभे करून दहशत माजवण्याचा त्यांनी अनेक वेळा प्रयत्न केला आहे. याबाबत गटविकास अधिकारी यांच्याकडे तक्रार करूनसुद्धा त्याकडे राजकीय दबावापोटी कानाडोळा केला जात आहे.
सदरच्या रेश्मा यटम या महिलेला मारहाण आकसापोटी केली आहे. अशा व्यक्तीला तत्काळ अटक करण्यात यावी.
दरम्यान तानाजी भोसले यांनी काही वर्षांपूर्वी ग्रामपंचायत च्या सरपंच व ग्रामसेवक यांच्या खोट्या सह्या करून सुमारे नऊ लाख रुपयांचा अपहार केला आहे. अशी गुन्हेगारी पार्श्वभूमी असलेली व्यक्ती पंचायत समिती च्या वाहनातून फिरत असेल,तर ती शाहुवाडी पंचायत समिती साठी लाजिरवाणी गोष्ट आहे. असे देखील अभयसिंह चौगुले यावेळी म्हणाले.
दरम्यान शित्तूर तर्फ वारुण येथील मागासवर्गीय समाजात वेगवेगळ्या प्रतिक्रिया उमटत आहेत. निवडणुकीच्या वेळी मतदान करण्यासाठी जे दोन हात जोडले जात होते, त्याच हातांनी मागासवर्गीय समाजाला झोडले आहे. अशी प्रतिक्रिया देखील ग्रामस्थांतून उमटताना दिसत आहे.
सदर च्या घटनेची नैतिक जबाबदारी स्वीकारून सभापती पदाचा सभापती प्रियांका भोसले यांनी राजीनामा द्यावा. अशी मागणी देखील या पंचायत समिती सदस्यांनी केली आहे. यावेळी सौ माधुरी पाटील, लक्ष्मी पाटील, डॉ.धनश्री पाटील, दिलीप पाटील,संदीप कांबळे डोणोलीकर, संजय घोलप, सर्जेराव आचरे, अशोक पाटील आदी मान्यवर उपस्थित होते.
