रसिका दिंडे ची परिस्थितीवर मात : दहावी त ९४.२० % मार्क्स

बांबवडे : सुपात्रे तालुका शाहुवाडी येथील रसिका रामचंद्र दिंडे या विद्यार्थिनीने दहावी च्या परीक्षेत ९४.२० % मार्क्स मिळवले. परिस्थिती कशीही असो, जिद्द आणि चिकाटी या गुणांनी परिस्थितीवर मात करता येते. हे दाखवून दिले. याबद्दल रसिकाचे साप्ताहिक शाहुवाडी टाईम्स व एसपीएस न्यूज परिवाराच्यावतीने हार्दिक अभिनंदन. 

सुपात्रे तालुका शाहुवाडी येथील दि न्यू इंग्लिश स्कूल ची रसिका रामचंद्र दिंडे या विद्यार्थिनीने ९४.२०% मार्क्स मिळवून कोणत्याही परिस्थितीवर जिद्द आणि चिकाटी मात करू शकते. हे दाखवून दिले. अत्यंत हलाखीच्या परिस्थितीमध्ये तिने हे यश मिळवले आहे.

तिचे वडील रामचंद्र दिंडे यांना ब्रेन ट्युमर झाला आहे. त्यावर उपचार सुरु आहेत. रामचंद्र दिंडे हे इचलकरंजी मध्ये वेल्डर म्हणून काम करीत होते. किरकोळ कारणासाठी ते दवाखान्यात गेले . आणि तिथे त्यांना ब्रेन ट्युमर झाला असल्याचे समजले. त्यामुळे त्यांच्या कुटुंबाला धक्का बसला आहे. घरात कमावणारा एकमेव व्यक्ती म्हणजे रामचंद्र दिंडे हेच आहेत. त्यामध्ये त्यांना असा आजार झाल्याचे समजताच अवघे कुटुंब चिंतेत सापडले आहे. त्यांच्या कुटुंबात  एकूण सात माणसे आहेत. त्यामुळे घराचा आर्थिक भार त्यांच्या एकट्यावरच आहे. तरीदेखील त्यांच्या नातेवाईकांनी मिळून रामचंद्र दिंडे यांच्यावर कोल्हापूर येथे दवाखान्यात उपचार सुरु केले आहेत.

अशा परिस्थितीत देखील रसिकाने मात्र आपले अभ्यासावारचे लक्ष्य ढळू न देता, अभ्यास केला आणि दहावी च्या  परीक्षेमध्ये ९४.२०% मार्क्स मिळवले. हे निश्चितच कौतुकास्पद आहे. यासाठी गटशिक्षणाधिकारी डॉ. विश्वास सुतार यांनी रसिकाच्या घराला भेट देवून तिचा सत्कार केला आणि तिचे अभिनंदन केले. दरम्यान भविष्यात तिला कोणतीही अडचण  आल्यास सहकार्य करण्याचे आश्वासन दिले. तसेच समाजातील  अनेक मान्यवरांनी रसिकाचा सत्कार करीत अभिनंदन केले .